Kanupriya

An extract from the romantic poetry by Dharamveer Bharti... very much suggesting what Kanupriya (Krishna ki priya ~ Radha) is all about...

"yeh jo mein kabhie kabhie charam shaksatkaar ke kshano mein
bilkul jad aur nispandh ho jati hun
iska marm tum samajhte kyu nahi Saanvre !

tumhari janm-janmantar ki rehasyamayi leela ki ekaant sangani mein

in kshano mein aksmaat
tumse prithak nahi ho jate mere praan,
tum yeh samajh kyu nahi paate ki laaj
sirf jism ki nahi hoti
mann ki bhi hoti hai
ek madhur bhay
ek anjana sanshay,
ek aagrah bhara gopan,
ek nirvyakhya vedna; udaasi,
jo mujhe baar-baar charam sukh ke kshano mein bhi abhibhoot kar leti hai !

bhay, sanshay, gopan, udaasi
ye sabhi dhith, chanchal, sarchadhi saheliyo ki tarhan
mujhe gher leti hain
aur mein kitna chah kar bhi tumhare pass thik uss samay
nahi pahunch pati jab aamr majriyo ke niche
aapni baansuri mein mera naam bhar kar tum bulate ho !

uss din tum uss baur lade aam ko
jhuki daaliyo se tike kitni der mujhe bansi se terte rahe
dhalte suraj ki udaas kanpti kirne
tumhare maathe ke moor pankho
se bebas vida mangne lagi -
mein nahi aayi.

gaaye kuch kshan tumhe aapni bholi aankho se
muah uthaye dekhti rahi aur fir
dheere-dheere nandgaon ki pagdandi par
bina tumhare aapne aap mud gayi -
mein nahi aayi.

yamuna ke ghaat par
machuo ne aapni navein bandh di
aur kandho par rakh patware chale gaye -
mein nahi aayi.

tumne bansi hotho se hata le thi
aur udaas, maun tum, aamr vriksh ki jado se tik kar baith gaye the.
aur baithe rahe, baithe rahe, baithe rahe
mein nahi aayi, nahi aayi, nahi aayi
tum aant mein uthe
ek jhuki daal par khila ek baur tumne toda
aur dheere dheere chal diye
anmane tumhare paun pagdandi par chal rahe the
par jante ho tumhare anjaan mein hi tumhari ungaliyan kiya kar rahi thi?

ve uss aamr majri ko chur chur kar
shyamal banghaso mein bichi uss maang si ujli pagdandi par bikher rahi thi...

yeh tumne kya kiya priye !
kya aapne anjane mein hi
uss aam ke baur se meri kavari ujli pavitr maang bhar rahe the Saanvre?

par mujhe dekho ki mein uss samay bhi to matha niche kar
iss aalaukik suhaag se pradeept hokar
maathe par palla daal kar
jhuk kar tumhari charan dhuli lekar
tumhe pranam karne -
nahi aayi, nahi aayi, nahi aayi !"